د خوست رسنیز کرکټ جام په روانو لوبو کې ژمن زلمیو سیاله د سولې پیغام اتلانو لوبډله له ماتې سره مخ کړه، او دوهم پړاو ته یې لاره ومونده.

په یاده لس اوریزه لوبه کې سولې پیغام اتلانو د ۸۹ منډو هدف ټاکلی و،چې ژمن زلمیو په ۸.۳ اورنو کې د ۷ ویکټو په بدل ترلاسه او بریا یې خپله کړه.

د سولې پیغام اتلانو لپاره عصمت پاچا مخکښ بېټسمېن و چې ۶۲ منډې یې ترلاسه کړې، خو د ژمن زلمیو بېټسمېن سلیمان سراج بیا خپله لوبډله د ۵۴ تېزو منډو په ترلاسه کولو سره بریا ته ورسوله.

نوموړی د روان جام په لوبو کې د څلورم ځل لپاره غوره لوبغاړی وټاکل شو.

د ژمن زلمي لوبډلې له دې بري سره وکولای شول چې دوهم راونډ ته د ټوټاپ لوبډلې په توګه لاره ومومي.

په خوست کې د ورزشي خبریالانو او شنونکو شورا له لوري د خوست رسنیو خبریالانو ترمنځ هر کال د کرکټ لوبې په لاره اچول کیږي چې په لړ کې یې رسنۍ د یو بل په وړاندې لوبې ترسره کوي.

ددې شورا مسؤلین له دغو لوبو موخه د رسنیو ترمنځ د یووالي او همغږۍ فضا رامنځته کول یادوي.