د ناحيو په کچه د فوټبال پيل شوې سيالۍ پای ته ورسېدې.
د خوست ښاروالۍ ښاري حکومتوالۍ امريت په کوربتوب د ناحيو په کچه د فوټبال پيل شوې سيالۍ د لکڼ منتخب لوبډلې په بريا سره پای ته ورسېدې.
د جمعې په ورځ د ښاروالۍ شاهين لوبډلې پر ميدان د پای لوبې مراسم نیول شوي وو، چې د ښاروالۍ د مسولينو ترڅنګ پکې د سيمې مشرانو او ځوانانو برخه لرله.
د ښاري حکومتوالۍ آمر محمدالله شېرزي د ورزش په برخه کې د ښاروالۍ پر ونډې او برنامو رڼا واچوله. د هغه پر وينا چې ښاروالي د خپلو نورو فعاليتونو ترڅنګ ورزش ته ځانګړې پاملرنه کوي، چې يوه برنامه يې د ناحيو په کچه د فوټبال دغه سيالۍ دي، چې مختلفو لوبډلو ته پکې د لوبیدو زمينه مساعده شوې.
پای لوبه کې د ښاروالۍ شاهين او لکڼ منتخب لوبډلې سره مخامخ شوې وې، چې د يوې هر اړخيزې او شور ډکې لوبې وروسته لکڼ منتخب وکولی شول، چې مقابلې لوبډلې ته 1-0 ماتې ورکړي او د سياليو اتلولي ترلاسه کړي.
په پای کې د لومړي او دويم مقام ګټونکو او د ټورنمېټ غوره لوبغاړي ته کپونه ورکړل شول او ريبار هڅاند ته چې د سياليو په تنظيم کې يې ډېرې هڅې کړې وې؛ د ښاروالۍ له لورې ورته ترتيب کړل شوی ستاينليک ډالۍ شو.
د غبرګولې ۲۸ مه – ۱۴۰۰